امریکا اور ایران کے درمیان دو ہفتے کی جنگ بندی کے معاہدے پر عالمی برادری نے خوشی اور حمایت کا اظہار کیا ہے۔
سیکرٹری جنرل اقوام متحدہ انتونیو گوتریس نے پاکستان سمیت دیگر ممالک کی کوششوں کو سراہا اور کہا کہ انسانی تکالیف کو کم کرنے کے لیے دشمنی کا خاتمہ ضروری ہے۔ انہوں نے فریقین پر زور دیا کہ عالمی قوانین کا احترام اور جنگ بندی کی شرائط پر مکمل عمل درآمد کیا جائے۔
ملائیشیا نے بھی امریکا اور ایران کے جنگ بندی معاہدے کا خیرمقدم کیا اور پاکستان کی سفارتی کوششوں کی تعریف کی۔ مصری وزارت خارجہ نے بیان میں کہا کہ دو ہفتے کی جنگ بندی سفارت کاری کو آگے بڑھانے کا ایک اور موقع فراہم کرے گی۔
آسٹریلوی وزیراعظم انتھونی البانیز نے کہا کہ امریکا اور ایران کے درمیان جنگ بندی خوش آئند ہے اور امید ہے کہ عارضی جنگ بندی مستقل امن کے قیام کی راہ ہموار کرے گی۔ نیوزی لینڈ اور جاپان نے بھی امریکا اور ایران کے درمیان جنگ بندی معاہدے کو سراہا اور خطے میں امن و استحکام کے فروغ پر زور دیا۔