پاکستان سمیت متعدد مسلم ممالک نے مسجد اقصیٰ میں اسرائیلی وزیر برائے قومی سلامتی اتمار بن گویر کے داخلے کی شدید مذمت کی ہے۔
ذرائع کے مطابق گزشتہ روز اتمار بن گویر نے فوجیوں کے ہمراہ مسجد اقصیٰ کے احاطے میں داخل ہو کر اس کے صحن کا دورہ کیا جسے پاکستانی دفتر خارجہ نے مذہبی اور تاریخی حرمت پر براہِ راست حملہ قرار دیا ہے۔
پاکستان کے دفترِ خارجہ نے بیان میں کہا کہ یہ اقدام بین الاقوامی قوانین کی کھلی خلاف ورزی ہے اور اسرائیلی حکام کی جانب سے مسجد اقصیٰ کی مذہبی اور قانونی حیثیت کو تبدیل کرنے کی تمام کوششیں ناقابلِ قبول ہیں۔
اس واقعے پر ترکی، قطر اور اردن نے بھی شدید ردعمل دیتے ہوئے اسے اشتعال انگیزی اور عالمی قوانین کی خلاف ورزی قرار دیا ہے۔