پاکستان ٹیلی کمیونیکیشن اتھارٹی نے شہریوں کو ہدایت جاری کی ہے کہ وہ موبائل فون سروسز کی بلا تعطل فراہمی یقینی بنانے کے لیے اپنے قومی شناختی کارڈ کو اپڈیٹ رکھیں۔
پی ٹی اے کے مطابق ملک بھر میں موبائل سروسز کو بغیر کسی رکاوٹ کے جاری رکھنے کے لیے اقدامات کیے جا رہے ہیں، تاہم اس حوالے سے صارفین کا تعاون بھی نہایت ضروری ہے۔
اتھارٹی نے واضح کیا ہے کہ وہ صارفین جن کے شناختی کارڈ کی معیاد ختم ہو چکی ہے یا جن کی سم کسی دوسرے کے نام پر رجسٹرڈ ہے، ان کی موبائل سروس کسی بھی وقت معطل یا بلاک کی جا سکتی ہے۔
ترجمان پی ٹی اے کا کہنا ہے کہ صارفین فوری طور پر اپنے قومی شناختی کارڈ کی تجدید کروائیں اور اپنی سموں کو اپنے نام پر رجسٹرڈ کروا کر کسی بھی ممکنہ پریشانی سے بچیں۔
پی ٹی اے نے مزید کہا کہ یہ اقدامات نہ صرف سروسز کی بہتری بلکہ سیکیورٹی کو یقینی بنانے کے لیے بھی کیے جا رہے ہیں، لہٰذا شہری اس سلسلے میں ذمہ داری کا مظاہرہ کریں۔