پاکستان پیپلز پارٹی پارلیمنٹیرینز کی مرکزی ترجمان شازیہ مری نے یومِ دستور کے موقع پر اپنے خصوصی پیغام میں کہا ہے کہ آئین ریاست کا اعلیٰ ترین قانون ہے جو ریاستی ڈھانچے اور بنیادی حقوق کی ضمانت دیتا ہے۔
انہوں نے کہا کہ 1973 کا آئین قائدِ عوام ذوالفقار علی بھٹو کے وژن کی عکاسی کرتا ہے جو اتحاد، جمہوریت اور وفاقی توازن پر مبنی تھا، اور یہ وہ متفقہ دستاویز ہے جس نے ملک میں پارلیمانی نظام کی بنیاد رکھی۔
شازیہ مری نے کہا کہ شہید محترمہ بے نظیر بھٹو نے جمہوریت اور آئینی بحالی کی جدوجہد کو مضبوط انداز میں آگے بڑھایا اور ان کی کاوشوں نے مشکل ترین ادوار میں بھی ملک میں آئینی تسلسل کو برقرار رکھا۔ انہوں نے آئین کی بالادستی اور بحالی کے لیے جدوجہد کرنے والے تمام افراد کو شاندار الفاظ میں سلام پیش کیا۔
ترجمان پی پی پی پی نے مزید کہا کہ صدر آصف علی زرداری نے اٹھارویں آئینی ترمیم کے ذریعے آئین اور صوبوں کو مضبوط بنایا، جس سے پارلیمانی بالادستی مستحکم ہوئی اور صوبائی خودمختاری کو وسعت ملی۔
انہوں نے واضح کیا کہ بلاول بھٹو زرداری ہمیشہ آئینی بالادستی اور جمہوری تسلسل پر زور دیتے ہیں، کیونکہ آئینِ پاکستان ہی ملک میں اتحاد، انصاف، استحکام اور قومی ہم آہنگی کی اصل بنیاد ہے۔