امریکی صدر ڈونلڈ ٹرمپ نے کیتھولک چرچ کے سربراہ پوپ لیو چہاردہم پر سخت تنقید کرتے ہوئے انہیں خارجہ پالیسی اور جرائم کے معاملات میں کمزور قرار دیا ہے جس کے بعد عالمی سطح پر اس بیان پر بحث شروع ہو گئی ہے۔
صدر ٹرمپ نے اپنے سوشل میڈیا پلیٹ فارم ٹروتھ سوشل پر جاری بیان میں کہا کہ پوپ لیو جرائم کے حوالے سے مؤثر مؤقف نہیں رکھتے اور خارجہ پالیسی کے لیے بھی موزوں نہیں ہیں جبکہ انہوں نے یہ بھی کہا کہ پوپ کو بطور مذہبی رہنما اپنے طرزِ عمل پر نظرثانی کرنی چاہیے۔
یہ بیان ایک ایسے وقت میں سامنے آیا ہے جب پوپ لیو، جو حالیہ برسوں میں پہلے امریکی نژاد پوپ کے طور پر منتخب ہوئے، بین الاقوامی معاملات خصوصاً ایران سے متعلق پالیسیوں پر کھل کر رائے دیتے رہے ہیں اور انہوں نے امریکہ اور اسرائیل کی جانب سے جاری کشیدگی کو تنقید کا نشانہ بنایا ہے۔
پوپ لیو اس سے قبل بھی ٹرمپ انتظامیہ کی امیگریشن پالیسیوں پر سوالات اٹھا چکے ہیں اور انہوں نے عالمی امن کے حوالے سے سخت بیانات دیے ہیں، جن میں جنگوں اور تشدد کے خلاف واضح مؤقف اختیار کیا گیا۔
میڈیا رپورٹس کے مطابق صدر ٹرمپ نے صحافیوں سے گفتگو کرتے ہوئے کہا کہ وہ پوپ کے بڑے مداح نہیں ہیں اور ان کے نزدیک پوپ لیو ایک حد سے زیادہ لبرل سوچ رکھنے والے رہنما ہیں جو جرائم کی روک تھام کے معاملے میں سخت مؤقف اختیار نہیں کرتے۔
ٹرمپ نے اپنی تنقید کو مزید بڑھاتے ہوئے کہا کہ پوپ جوہری ہتھیاروں کے حوالے سے بھی کمزور پالیسی رکھتے ہیں، جو عالمی سلامتی کے تناظر میں ایک حساس معاملہ ہے۔
یہ کشیدگی اس وقت مزید بڑھ گئی جب پوپ لیو نے حالیہ بیان میں امریکی صدر کی جانب سے ایران کے خلاف سخت مؤقف اور تہذیبی تباہی کی دھمکی کو ناقابل قبول قرار دیا تھا اور اسے عالمی امن کے لیے خطرہ بتایا تھا۔
گزشتہ دنوں ویٹیکن میں ایک مذہبی اجتماع سے خطاب کرتے ہوئے پوپ لیونے کہا تھا کہ خدا ان رہنماؤں کی دعائیں قبول نہیں کرتا جو جنگوں کو ہوا دیتے ہیں اور جن کے فیصلوں سے انسانی جانوں کا ضیاع ہوتا ہے، جبکہ انہوں نے جاری تنازعات کو ہولناک قرار دیتے ہوئے فوری طور پر کشیدگی کم کرنے پر زور دیا۔
پوپ لیو نے عالمی رہنماؤں سے مطالبہ کیا کہ وہ جنگ اور تشدد کے بجائے مذاکرات اور امن کا راستہ اختیار کریں، جبکہ انہوں نے خاص طور پر امریکہ سے کہا کہ وہ تنازعات کے حل کے لیے سنجیدہ اقدامات کرے۔
دوسری جانب صدر ٹرمپ نے اپنے بیان میں یہ دعویٰ بھی کیا کہ پوپ لیو کا انتخاب ایک سیاسی حکمت عملی کا حصہ تھا، جس کے ذریعے انہیں امریکی قیادت کے مقابل لایا گیا تاہم ویٹیکن کی جانب سے اس بیان پر فوری طور پر کوئی ردعمل سامنے نہیں آیا ہے۔