ایرانی پاسداران انقلاب کی قدس فورس کے کمانڈر بریگیڈیئر جنرل اسماعیل قانی نے واشنگٹن کو خبردار کرتے ہوئے کہا ہے کہ امریکا ماضی کی طرح مستقبل میں بھی ناکامی سے دوچار ہوگا، اور اگر خطے میں کشیدگی برقرار رہی تو ایران اپنے مزید جدید اور خفیہ ہتھیار سامنے لانے کی بھرپور صلاحیت رکھتا ہے۔
تہران میں خطاب کرتے ہوئے انہوں نے واضح کیا کہ دشمن ایران کی دفاعی طاقت کا درست اندازہ لگانے میں مکمل طور پر ناکام رہا ہے۔
جنرل اسماعیل قانی نے امریکی صدر ڈونلڈ ٹرمپ کی جانب سے ممکنہ فوجی مداخلت کو لاحاصل قرار دیتے ہوئے کہا کہ آبنائے ہرمز میں ایران کی موجودگی انتہائی مؤثر ہے اور کسی بھی غیر ملکی بحری جہاز کی مداخلت یا قریب آنے کی کوشش پر سخت فوجی کارروائی کی جائے گی۔
انہوں نے خبردار کیا کہ آبنائے ہرمز میں کسی بھی قسم کی ناکہ بندی یا تنازع کی صورت میں عالمی سطح پر توانائی کی سپلائی شدید متاثر ہوسکتی ہے، جس کی تمام تر ذمہ داری جارحیت کرنے والے ممالک پر ہوگی۔