ایرانی وزارتِ خارجہ کے ترجمان اسماعیل بقائی نے کہا ہے کہ ایران اور امریکا کے درمیان پاکستان کے ذریعے رابطوں اور پیغامات کے تبادلے کا سلسلہ جاری ہے۔

ترجمان کے مطابق پاکستان کی جانب سے ایرانی وفد کی واپسی کے بعد دونوں فریقوں کے درمیان متعدد مرتبہ پیغامات کا تبادلہ ہوا ہے۔ انہوں نے یہ بھی بتایا کہ بدھ کے روز پاکستانی وفد کے تہران آنے کا امکان ہے، جو امریکا کے ساتھ جاری مذاکراتی عمل سے متعلق ہوگا۔

اسماعیل بقائی نے مزید کہا کہ پاکستان میں ہونے والے مذاکرات میں جنگ کے مکمل خاتمے اور جنگ سے ہونے والے نقصانات کے ازالے جیسے اہم نکات پر بات چیت کی گئی ہے۔

امریکی محاصرہ جاری رہا تو بحیرہ احمر کے راستے بھی تجارت ممکن نہیں رہے گی، ایرانی فوج

دوسری جانب ایرانی فوج کے ترجمان نے سخت مؤقف اختیار کرتے ہوئے کہا ہے کہ اگر امریکی پابندیاں اور محاصرہ جاری رہا تو خلیج فارس میں تجارتی سرگرمیاں متاثر ہوں گی اور بحیرہ احمر کے راستے تجارت بھی ممکن نہیں رہے گی۔

ان کا کہنا تھا کہ ایسی صورتحال کو جنگ بندی کی خلاف ورزی تصور کیا جائے گا۔