امریکی وزیر دفاع پیٹ ہیگسیتھ نے ایران کے حوالے سے سخت موقف اپناتے ہوئے کہا ہے کہ آبنائے ہرمز کی بندش کی صورت میں اسے کھلوانے کے لیے ایران کا انفراسٹرکچر تباہ کیا جاسکتا ہے۔
ایک حالیہ نیوز کانفرنس میں انہوں نے دعویٰ کیا کہ امریکی کارروائیوں نے ایرانی بحریہ، فضائیہ اور میزائل سسٹم کو پہلے ہی شدید نقصان پہنچایا ہے، جس کی وجہ سے ایران کی بحری صلاحیت اب محدود ہوچکی ہے۔
پیٹ ہیگسیتھ کا کہنا تھا کہ ایران اپنے تباہ شدہ میزائل لانچرز کو دوبارہ فعال کرنے کی کوششوں میں مصروف ہے، تاہم امریکا اس کی تمام تر عسکری سرگرمیوں اور اثاثوں کی نقل و حرکت پر گہری نظر رکھے ہوئے ہے۔
انہوں نے واضح کیا کہ ایران کو کسی صورت جوہری ہتھیار حاصل کرنے کی اجازت نہیں دی جائے گی۔
امریکی وزیر دفاع نے مزید کہا کہ اگرچہ دونوں ممالک کے درمیان مذاکراتی عمل جاری ہے، تاہم ایران امریکی عسکری طاقت کا مقابلہ کرنے کی صلاحیت نہیں رکھتا۔