ایران ڈیل ہوگئی تو پاکستان جاسکتا ہوں، امریکی صدر

امریکی صدر ڈونلڈ ٹرمپ نے اسرائیل اور لبنان کے درمیان 10 روزہ جنگ بندی کا اعلان کرتے ہوئے ایران کے ساتھ ممکنہ امن معاہدے پر بھی اہم پیش رفت کا عندیہ دیا ہے۔

میڈیا سے گفتگو میں صدر ٹرمپ نے کہا کہ ایران کے ساتھ مذاکرات جاری ہیں اور ویک اینڈ پر اہم ملاقات متوقع ہے۔ انہوں نے خبردار کیا کہ اگر معاہدہ نہ ہوا تو جنگ دوبارہ شروع ہو سکتی ہے۔

ٹرمپ کے مطابق ایران اب ان نکات پر آمادہ ہو گیا ہے جن پر پہلے رضامند نہیں تھا اور اس نے یقین دہانی کرائی ہے کہ وہ جوہری ہتھیار نہ بنائے گا اور نہ ہی اپنے پاس رکھے گا۔

امریکی صدر نے دعویٰ کیا کہ ایران کی عسکری صلاحیتیں کمزور ہو چکی ہیں جبکہ مذاکرات مثبت سمت میں آگے بڑھ رہے ہیں۔انہوں نے پاکستان کے کردار کو بھی سراہتے ہوئے کہا کہ پاکستان نے خطے میں امن کے لیے بہت اچھا کام کیا ہے۔

ٹرمپ نے سپہ سالار فیلڈ مارشل سید عاصم منیر اور وزیراعظم شہباز شریف کی کاوشوں کو بھی خراج تحسین پیش کیا اور عندیہ دیا کہ اگر ایران سے معاہدہ طے پا گیا تو وہ اس پر دستخط کے لیے پاکستان آ سکتے ہیں۔

صدر ٹرمپ نے مزید بتایا کہ اسرائیلی وزیراعظم اور لبنانی صدر سے ان کی ٹیلیفون پر مثبت بات چیت ہوئی ہے اور دونوں ممالک جنگ بندی پر آمادہ ہیں جبکہ وہ جلد دونوں رہنماؤں سے ملاقات بھی کریں گے۔