ایران کی پارلیمنٹ کے اسپیکر محمد باقر قالیباف نے کہا ہے کہ تہران امریکا کے ساتھ مذاکرات کا عمل جاری رکھے ہوئے ہے تاہم بڑھتی ہوئی کشیدگی کے پیش نظر ایران ہر ممکن صورتحال کے لیے مکمل طور پر تیار ہے۔
غیر ملکی میڈیا کے مطابق ٹیلی ویژن پر اپنے بیان میں انہوں نے کہا کہ ایران اپنے مخالفین پر اعتماد نہیں کرتا اور صورتحال کسی بھی وقت مزید بگڑ سکتی ہے۔
محمد باقر قالیباف نے واضح کیا کہ ہم دشمن پر بھروسہ نہیں کرتے، جنگ کسی بھی لمحے شدت اختیار کر سکتی ہے۔
نیم سرکاری خبر رساں ادارے مہر کے مطابق انہوں نے کہا کہ ایران ایک جانب سفارتی عمل جاری رکھے ہوئے ہے جبکہ دوسری جانب قومی سلامتی کے لیے تمام ضروری اقدامات بھی کیے جا رہے ہیں۔
ان کا مزید کہنا تھا کہ موجودہ حالات میں مذاکرات اہم ضرور ہیں لیکن کسی بھی ممکنہ خطرے سے نمٹنے کے لیے تیار رہنا بھی ناگزیر ہے۔