مشرق وسطیٰ میں جنگ کی صورتحال اور بڑھتی ہوئی مہنگائی کے باعث برطانیہ میں پیٹرول پمپس سے ایندھن چوری کرنے کے واقعات میں 62 فیصد اضافہ ریکارڈ کیا گیا ہے۔
پیٹرول چوروں سے رقم وصول کرنے والی کمپنی 'پے مائی فیول' کے اعداد و شمار کے مطابق، ایران پر حملے کے بعد پیٹرول کی قیمتوں میں غیر معمولی اضافے نے عام شہریوں کی مشکلات بڑھا دی ہیں، جس کے نتیجے میں ایک عام خاندان کو گاڑی کی ٹنکی بھروانے کے لیے پیٹرول پر 14 پاؤنڈ اور ڈیزل پر 27 پاؤنڈ سے زائد اضافی رقم ادا کرنا پڑ رہی ہے۔
قیمتوں میں اس اضافے کے سبب پیٹرول پمپس پر کام کرنے والے عملے سے بدسلوکی کے واقعات بھی تواتر سے رپورٹ ہو رہے ہیں۔
جنوبی انگلینڈ میں متعدد پیٹرول پمپس کے مالک مسٹر جوش کا کہنا ہے کہ پہلے ہفتے میں صرف ایک یا دو بار پیٹرول چوری کے واقعات پیش آتے تھے، تاہم اب یہ تعداد پانچ تک پہنچ چکی ہے، جس سے انہیں ہفتہ وار تقریباً دو ہزار پاؤنڈ کا نقصان ہو رہا ہے۔
برطانوی حکومت نے اس صورتحال پر سخت ردعمل ظاہر کرتے ہوئے کہا ہے کہ پیٹرول چوری میں ملوث افراد کے خلاف قانون کی پوری قوت استعمال کی جائے گی اور ان سے سختی سے نمٹا جائے گا۔