ڈونلڈ ٹرمپ نے آبنائے ہرمز پر مکمل کنٹرول کا دعویٰ کرتے ہوئے کہا ہے کہ امریکا ایران کے ساتھ معاہدے کے لیے تیار ہے۔
وائٹ ہاؤس میں میڈیا سے گفتگو کرتے ہوئے امریکی صدر نے کہا کہ ایران کو بہتر ڈیل کا موقع دیا جا رہا ہے اور معاہدہ ہونے کی صورت میں آبنائے ہرمز کھول دی جائے گی۔ ان کے مطابق ایران کی ناکہ بندی کے باعث اس کی معیشت متاثر ہو رہی ہے۔
ٹرمپ نے یہ بھی دعویٰ کیا کہ امریکا نے ایران میں 75 فیصد تک اہداف حاصل کر لیے ہیں اور اگر ضرورت پڑی تو امریکی فوج ایک دن میں صورتحال تبدیل کرنے کی صلاحیت رکھتی ہے۔ تاہم انہوں نے ایران کے خلاف ایٹمی ہتھیار استعمال نہ کرنے کا بھی اعلان کیا۔
انہوں نے کہا کہ ایران کے ساتھ طویل المدتی اور پائیدار امن معاہدہ چاہتے ہیں اور جلد بازی نہیں کی جائے گی۔ ساتھ ہی انہوں نے خبردار کیا کہ امریکی شہریوں کو کچھ عرصے تک پیٹرول اور گیس کی قیمتوں میں اضافہ برداشت کرنا پڑ سکتا ہے۔