سندھ ہائی کورٹ نے میڈیکل کالجز میں داخلوں کے لیے ایم ڈی کیٹ کے کم از کم نمبرز کی شرط کے خلاف دائر درخواست مسترد کرتے ہوئے قرار دیا ہے کہ داخلہ پالیسی اور معیار مقرر کرنا پاکستان میڈیکل اینڈ ڈینٹل کونسل کا اختیار ہے۔
عدالت نے اپنے ریمارکس میں کہا کہ قانون کے تحت پی ایم ڈی سی کو داخلوں کے معیار اور پالیسی بنانے کا مکمل استحقاق حاصل ہے۔ عدالت کا کہنا تھا کہ میڈیکل تعلیم ایک مقدس پیشہ ہے اور اس میں میرٹ پر کسی قسم کا سمجھوتہ نہیں کیا جاسکتا۔
سماعت کے دوران عدالت کو بتایا گیا کہ سندھ حکومت نے بھی میرٹ کم کرنے کی مخالفت کی ہے، جس پر عدالت نے کہا کہ معیار میں کمی کرنا ان طلباء کے ساتھ ناانصافی ہوگی جو میرٹ پر پورا اترتے ہیں۔
عدالت نے مزید ریمارکس دیے کہ سپریم کورٹ آف پاکستان بھی خالی نشستوں کی بنیاد پر میرٹ کم کرنے کے حق میں نہیں ہے۔ عدالت کے مطابق خالی نشستوں کا حل معیار کم کرنا نہیں بلکہ مستحق طلباء کو سہولیات فراہم کرنا ہے۔