کراچی کے علاقے پرانا گولیمار کے مکینوں نے روزانہ 16 سے 18 گھنٹے کی طویل لوڈشیڈنگ کے خلاف شدید احتجاج کیا۔ مظاہرے میں خواتین، بچوں اور بزرگوں کی بڑی تعداد شریک ہوئی جنہوں نے پلے کارڈز اٹھا کر بجلی کی بندش کے خلاف سخت نعرے بازی کی۔
مظاہرین کا موقف تھا کہ شدید گرمی کے عالم میں بجلی کی غیر موجودگی نے ان کی زندگی اجیرن کردی ہے اور گھریلو و کاروباری نظام مکمل طور پر مفلوج ہو کر رہ گیا ہے۔
علاقہ مکینوں نے شکایت کی ہے کہ بجلی نہ ہونے کی وجہ سے پانی کی قلت کا مسئلہ بھی سنگین صورتحال اختیار کر چکا ہے۔
انہوں نے حکام سے مطالبہ کیا کہ بجلی کی فراہمی کو فوری طور پر بحال اور لوڈشیڈنگ کے دورانیے میں کمی کی جائے، بصورتِ دیگر احتجاج کا دائرہ کار بڑھا دیا جائے گا۔