دبئی نے پراپرٹی ویزا قوانین میں نرمی کرتے ہوئے سرمایہ کاروں کے لیے نئی سہولیات کا اعلان کیا ہے جس کے تحت جائیداد خریدنے پر 2 سالہ رہائشی ویزا حاصل کرنا مزید آسان بنادیا گیا ہے۔
نئے قواعد کے مطابق اب 2 سالہ رہائشی ویزا کے لیے سنگل مالک ہونے کی شرط ختم کردی گئی ہے جبکہ مشترکہ پراپرٹی پر بھی ویزا حاصل کیا جاسکے گا۔ حکام کے مطابق مشترکہ ملکیت میں ہر سرمایہ کار کا حصہ کم از کم 4 لاکھ درہم ہونا ضروری ہوگا۔
دبئی حکام کا کہنا ہے کہ 2 سالہ انویسٹر ویزا اب زیادہ آسان اور قابل رسائی ہو گیا ہے۔ اس کے ساتھ 5 سالہ ریٹائرمنٹ ویزا کے لیے 10 لاکھ درہم کی سرمایہ کاری اور کم از کم عمر 55 سال کی شرط برقرار ہے۔
اسی طرح 10 سالہ گولڈن ویزا کے لیے 20 لاکھ درہم کی سرمایہ کاری لازمی قرار دی گئی ہےجس میں فیملی اور گھریلو ملازمین کی اسپانسرشپ کی سہولت بھی شامل ہے جبکہ گولڈن ویزا ہولڈرز کو متحدہ عرب امارات سے باہر رہنے کی اجازت بھی حاصل ہوگی۔