امریکی خبر رساں ویب سائٹ ایکسیوس کی ایک حالیہ رپورٹ نے مشرقِ وسطیٰ کی بدلتی صورتحال کے حوالے سے اہم اشارہ دیا ہے۔ رپورٹ کے مطابق وائٹ ہاؤس اور ایران کے درمیان کشیدگی کم کرنے اور جوہری مذاکرات کو دوبارہ آگے بڑھانے کے لیے ایک مختصر معاہدے پر پیش رفت ہو رہی ہے اور دونوں فریق اس مرحلے پر پہلے سے کہیں زیادہ قریب دکھائی دے رہے ہیں۔
ذرائع کے مطابق یہ مجوزہ مفاہمت ایک مختصر مگر اہم نکات پر مشتمل دستاویز ہے جس میں کل چودہ بنیادی شقیں شامل ہیں۔ اس عمل میں امریکی نمائندے اسٹیو وٹکوف اور جیرڈ کشنر براہِ راست اور ثالثوں کے ذریعے ایرانی حکام سے رابطے میں ہیں۔ اطلاعات کے مطابق آئندہ 48 گھنٹوں میں ایران کی جانب سے ان نکات پر ردعمل سامنے آنے کی توقع ہے تاہم ابھی تک کسی حتمی معاہدے کی تصدیق نہیں ہوئی۔
رپورٹ میں بتایا گیا ہے کہ اگر یہ ابتدائی سمجھوتہ طے پا جاتا ہے تو خطے میں جاری تناؤ کو کم کرنے کا اعلان کیا جاسکتا ہے جس کے بعد 30 دن کا ایک عبوری مرحلہ شروع ہوگا۔ اس عرصے میں اہم معاملات جیسے آبنائے ہرمز کی بحالی، ایران کے جوہری پروگرام پر حدود اور امریکی پابندیوں میں نرمی جیسے نکات پر تفصیلی مذاکرات کیے جائیں گے۔ اس دوران دونوں جانب سے عائد بحری پابندیوں میں بتدریج کمی لانے کا بھی امکان ظاہر کیا گیا ہے۔
امریکی حکام کے مطابق اگر بات چیت ناکام رہتی ہے تو واشنگٹن کے پاس دوبارہ سخت اقدامات، حتیٰ کہ فوجی آپشن استعمال کرنے کا اختیار موجود ہوگا۔ دوسری جانب ایران نے واضح کیا ہے کہ وہ کسی بھی سمجھوتے کو صرف اسی صورت میں قبول کرے گا جب اسے منصفانہ اور متوازن سمجھا جائے۔
ادھر امریکی صدر ڈونلڈ ٹرمپ کی جانب سے شروع کیے گئے بحری مشن پروجیکٹ فریڈم کو روکنے کے فیصلے نے بھی اس صورتحال پر اثر ڈالا ہے، کیونکہ اس اقدام کے بعد ایک ماہ سے جاری جنگ بندی غیر یقینی کا شکار ہوگئی تھی۔
اگرچہ امریکی حکومت کی جانب سے اس رپورٹ پر باضابطہ ردعمل سامنے نہیں آیا لیکن اس پیش رفت کی خبر آتے ہی مالیاتی منڈیوں میں مثبت رجحان دیکھا گیا جو اس بات کی علامت ہے کہ سرمایہ کار اس ممکنہ پیش رفت کو امید کی نظر سے دیکھ رہے ہیں۔