وفاقی وزیر داخلہ محسن نقوی نے کہا ہے کہ معرکۂ حق میں اللہ تعالیٰ کی مدد سے پاکستان کو کامیابی حاصل ہوئی۔ وزیر مملکت برائے داخلہ طلال چوہدری کے ہمراہ پریس کانفرنس کرتے ہوئے محسن نقوی نے کہا کہ ملک بھر میں معرکۂ حق سے متعلق تقریبات جاری ہیں اور افواج پاکستان نے قوم کا سر فخر سے بلند کیا ہے۔
انہوں نے کہا کہ بھارت نے مختلف علاقوں میں چھوٹے اور درمیانے درجے کے ڈرونز بھیجے تاہم زیادہ تر ڈرونز کو بارڈر پر رینجرز نے تباہ کر دیا۔ انہوں نے کہا کہ بھارت نے سائبر حملوں کی بھی کوشش کی لیکن وہ کامیاب نہ ہو سکا۔
محسن نقوی نے کہا کہ جنگ کے دوران ڈرون ٹیکنالوجی کا غیر معمولی استعمال ہوا جو پہلے کبھی نہیں دیکھا گیا بھارتی میڈیا اس دوران کنفیوژن کا شکار رہا جبکہ پاکستانی میڈیا نے قومی اتحاد کو مضبوط کیا۔
وزیر داخلہ نے کہا کہ نئی دہلی میں بھارتی وزیراعظم کے گھر کے اوپر ہمارے ڈرون گھومتے رہے جس سے بھارتی خوف میں مبتلا تھے، وزیر داخلہ نے کہا کہ ہم نے کارروائیوں کے دوران بھارتی سویلین آبادی کو نشانہ نہیں بنایا گیا جبکہ بھارت نے پاکستانی شہری علاقوں کو نقصان پہنچایا۔
وزیر داخلہ نے بتایا کہ پاک فوج نے معرکۂ حق میں اہم اہداف حاصل کیے اور بڑے بھارتی ٹارگٹس بشمول تنصیبات کو نشانہ بنایا گیا جس کے بعد جنگ بندی کی کوششیں شروع ہوئیں۔انہوں نے مزید کہا کہ پاکستان کی انٹیلی جنس ایجنسیوں نے بروقت معلومات فراہم کر کے اہم کردار ادا کیا اور آپریشن بنیان مرصوص میں بھی ان کا مرکزی کردار رہا۔
وزیر داخلہ کا کہنا تھا پاک بھارت جنگ کے دوران امریکی صدر ٹرمپ نے بھارت کو بڑے نقصان سے بچایا بھارت کو اتنا نقصان پہنچا ہے کہ بھارت پاکستان کے خلاف مزید کوئی مہم جوئی کرنے سے پہلے کئی بار سوچے گا۔