فلسطینی شہر نابلس میں ایک ایسا دل دہلا دینے والا واقعہ پیش آیا جس نے ایک خاندان کی خوشیوں کو چند لمحوں میں ماتم میں بدل دیا۔ 26 سالہ فلسطینی نوجوان نایف سمارو اپنے پہلے بچے کی آمد کا بے چینی سے انتظار کر رہا تھا مگر وہ اپنے نومولود بیٹے کو دیکھنے سے پہلے ہی اسرائیلی فائرنگ کا نشانہ بن گیا۔
رپورٹس کے مطابق نایف اپنی اہلیہ کے لیے کچھ ضروری سامان لینے گھر سے نکلا تھا۔ اس کی اہلیہ اسپتال میں داخل تھیں اور ڈاکٹروں نے چند گھنٹوں بعد سیزیرین آپریشن کے ذریعے بچے کی پیدائش کا وقت دیا تھا۔ اہل خانہ کا کہنا ہے کہ نایف اپنے پہلے بچے کی پیدائش پر بے حد خوش تھا اور مسلسل اس لمحے کا انتظار کر رہا تھا۔
اسی دوران نابلس میں اسرائیلی فوج کی کارروائیاں جاری تھیں۔ عینی شاہدین کے مطابق چھاپے کے دوران اسرائیلی اہلکاروں نے نایف کو سر میں گولی ماری۔ وہ زخمی حالت میں سڑک پر پڑا رہا اور زیادہ خون بہنے کے باعث جانبر نہ ہو سکا۔
افسوسناک بات یہ رہی کہ چند گھنٹے بعد اس کے بیٹے کی پیدائش تو ہوگئی لیکن باپ اپنے بچے کو ایک نظر بھی نہ دیکھ سکا۔ گھر میں جہاں نئے مہمان کی آمد کی تیاریاں تھیں وہاں اچانک غم اور خاموشی چھا گئی۔
فلسطینی حلقوں نے اس واقعے پر شدید دکھ اور غصے کا اظہار کرتے ہوئے شہری علاقوں میں جاری کارروائیوں کو انسانی جانوں کے لیے خطرناک قرار دیا ہے۔ کئی افراد کا کہنا ہے کہ ایسے واقعات عام خاندانوں کی زندگیوں کو ناقابلِ تلافی نقصان پہنچا رہے ہیں۔