اسپین کی پولیس نے کینری جزائر کے قریب ایک بڑی کارروائی کرتے ہوئے بحری جہاز سے 30 ٹن کوکین برآمد کرلی ہے، جسے یورپی تاریخ میں منشیات کی سب سے بڑی کھیپ قرار دیا جا رہا ہے۔
بین الاقوامی مارکیٹ میں اس کوکین کی مالیت تقریباً 956 ملین امریکی ڈالر (ایک ارب ڈالر کے قریب) بتائی گئی ہے۔
اسپین کی ہائی کورٹ کے مطابق یکم مئی کو کومورو جزائر کے پرچم بردار جہاز ’Arconian‘ کو روکا گیا، جس کے نتیجے میں جہاز کے عملے سمیت 23 افراد کو حراست میں لیا گیا۔ گرفتار شدگان میں فلپائن، نیدرلینڈز اور سرینام کے باشندے شامل ہیں۔ تلاشی کے دوران جہاز سے منشیات کے علاوہ اسلحہ اور گولہ بارود بھی برآمد ہوا ہے۔
یہ آپریشن امریکی اور ڈچ حکام کے تعاون سے انجام دیا گیا کیونکہ تفتیش کاروں کو شبہ تھا کہ یہ منشیات چھوٹی کشتیوں کے ذریعے اسپین کے مرکزی علاقوں میں اسمگل کی جانی تھی۔
واضح رہے کہ یہ برآمدگی جون 2024 میں جرمنی سے ملنے والی 25 ٹن کوکین اور اسپین کے گزشتہ 13 ٹن کے ریکارڈ سے کہیں زیادہ بڑی کارروائی ہے۔