افغانستان کے صوبہ بدخشاں میں طالبان اور مقامی رہائشیوں کے درمیان جھڑپوں کے دوران 2 شہری جاں بحق ہوگئے جبکہ کشیدگی میں اضافے کے باعث صورتحال مزید خراب ہونے کا خدشہ ظاہر کیا جارہا ہے۔
افغان میڈیا رپورٹس کے مطابق مقامی جریدے افغان انٹرنیشنل نے دعویٰ کیا ہے کہ ضلع ارگو میں وسائل پر قبضے کے تنازع کے بعد طالبان فورسز اور مقامی افراد کے درمیان جھڑپیں جاری ہیں۔
رپورٹس کے مطابق جھڑپوں کے دوران طالبان فورسز کی فائرنگ سے 2 شہری جان کی بازی ہار گئے، جبکہ احتجاج میں شدت آنے کے باعث ہلاکتوں میں اضافے کا خدشہ بھی ظاہر کیا جا رہا ہے۔
میڈیا رپورٹس میں یہ بھی کہا گیا ہے کہ طالبان انتظامیہ نے صورتحال سے متعلق اطلاعات کے پھیلاؤ کو محدود کرنے کے لیے بدخشاں میں موبائل سروس معطل کردی ہے۔