بھارتی ریاست اتر پردیش میں ایک مدرسے کے اندر نصب پنکھے پر ’میڈ اِن پاکستان‘ کا اسٹیکر دیکھ کر پولیس حرکت میں آگئی اور تحقیقات کے دوران مدرسے کے منتظم سمیت 2 افراد کو حراست میں لے لیا گیا۔
بھارتی میڈیا رپورٹس کے مطابق سوشل میڈیا پر ایک تصویر تیزی سے وائرل ہوئی جس میں پنکھے پر پاکستانی ساخت کا لیبل نمایاں تھا۔ تصویر سامنے آنے کے بعد بعض افراد نے پولیس سے معاملے کی مکمل جانچ کا مطالبہ کیا۔
رپورٹس کے مطابق پولیس نے تحقیقات شروع کرتے ہوئے مدرسے کے منیجر اور ایک اور شخص کو گرفتار کر کے پوچھ گچھ کی۔ دورانِ تفتیش معلوم ہوا کہ متعلقہ پنکھا سعودی عرب سے خریدا گیا تھا۔
پولیس نے پنکھے کی خریداری سے متعلق دستاویزات کا جائزہ لیا اور مختلف پہلوؤں سے معاملے کی چھان بین کی۔ بعد ازاں دستاویزات کی تصدیق اور تفصیلی انکوائری میں کوئی مشکوک بات سامنے نہ آنے پر دونوں افراد کو رہا کر دیا گیا۔