عرب میڈیا کی رپورٹس کے مطابق اسرائیلی ڈرونز نے بیروت کو جنوبی لبنان سے ملانے والی مرکزی شاہراہ پر ایک گاڑی کو نشانہ بنایا ہے، جس کے نتیجے میں 8 افراد شہید ہوگئے۔ اس کارروائی کے باعث مذکورہ شاہراہ پر شدید خوف و ہراس پھیل گیا اور آمد و رفت متاثر ہوئی۔
لبنان کے سرکاری میڈیا نے تصدیق کی ہے کہ اسرائیل کی جانب سے کی جانے والی حالیہ فضائی بمباری اور حملوں میں گزشتہ 24 گھنٹوں کے دوران کم از کم 13 افراد جاں بحق ہوچکے ہیں۔ جاں بحق ہونے والوں میں دو امدادی کارکن بھی شامل ہیں جو اپنی خدمات انجام دے رہے تھے۔
لبنانی حکام کے مطابق اسرائیل کی جانب سے مختلف علاقوں کو نشانہ بنانے کا سلسلہ وقفے وقفے سے جاری ہے جس سے جانی و مالی نقصان میں مسلسل اضافہ ہورہا ہے۔