مذاکرات میں سب سے بڑی رکاوٹ باہمی عدم اعتماد اور امریکی رویہ ہے، ایرانی وزیر خارجہ

ایران کے وزیر خارجہ عباس عراقچی نے کہا ہے کہ پاکستان کی ثالثی میں امریکا کے ساتھ ہونے والے مذاکرات ناکام نہیں ہوئے تاہم یہ عمل اس وقت مشکلات کا شکار ہے۔

نئی دہلی میں پریس کانفرنس کرتے ہوئے ایرانی وزیر خارجہ نے کہا کہ ایران نے جنگ کا آغاز نہیں کیا بلکہ صرف اپنا دفاع کیا ہے اور تہران جنگ بندی برقرار رکھنے کی کوشش کر رہا ہے۔

ایرانی وزیر خارجہ نے کہا کہ آبنائے ہرمز کے اطراف صورتحال انتہائی پیچیدہ ہے اور وہاں بارودی سرنگوں کی موجودگی کے باعث جہازوں کو ایرانی بحریہ سے رابطے کی ہدایت کی جا رہی ہے۔

انہوں نے کہا کہ ایران صرف اسی صورت مذاکرات میں دلچسپی رکھتا ہے جب دوسرا فریق سنجیدہ ہو۔ ان کے مطابق امریکا پر ایران کو بالکل اعتماد نہیں اور موجودہ مذاکرات میں سب سے بڑی رکاوٹ باہمی عدم اعتماد اور امریکی رویہ ہے۔

عباس عراقچی کا کہنا تھا کہ ایران کبھی ایٹمی ہتھیار حاصل نہیں کرنا چاہتا اور 2015 کے معاہدے میں اس حوالے سے ثبوت بھی پیش کیے جا چکے ہیں۔ انہوں نے واضح کیا کہ ایران کا جوہری پروگرام صرف پُرامن مقاصد کے لیے ہے۔

روسی تعلقات پر بات کرتے ہوئے ایرانی وزیر خارجہ نے کہا کہ روس کے ساتھ ایران کے اسٹریٹیجک تعلقات مضبوط ہیں اور دونوں ممالک بین الاقوامی و علاقائی امور پر مسلسل رابطے میں رہتے ہیں۔

انہوں نے مزید کہا کہ یورینیم افزودگی کی منتقلی سے متعلق روسی پیشکش پر فی الحال غور نہیں کیا جا رہا جبکہ اس معاملے پر امریکا کے ساتھ مذاکرات میں ڈیڈ لاک موجود ہے۔

ایک سوال کے جواب میں عباس عراقچی نے کہا کہ ایران ہمیشہ سفارتکاری کا خیر مقدم کرتا ہے تاہم امریکا کی جانب سے متضاد پیغامات نے مذاکراتی عمل پر شکوک پیدا کر دیے ہیں۔