اسرائیل اور ایران کے درمیان ایک مرتبہ پھر تناؤ میں اضافے کے امکانات ظاہر کیے جا رہے ہیں جبکہ اسرائیلی میڈیا نے دعویٰ کیا ہے کہ گزشتہ ایک دن کے دوران امریکا کے کئی کارگو طیارے بڑی مقدار میں اسلحہ اور فوجی سامان لے کر اسرائیل پہنچے ہیں۔
رپورٹس کے مطابق امریکی فوجی طیاروں نے اسرائیل کے مختلف اڈوں پر لینڈ کیا جہاں میزائل، گولا بارود اور دیگر دفاعی سازوسامان منتقل کیا گیا۔ اسرائیلی ذرائع کا کہنا ہے کہ یہ سرگرمیاں ممکنہ طور پر ایران کے خلاف نئی عسکری تیاریوں سے جڑی ہو سکتی ہیں۔
میڈیا رپورٹس میں یہ بھی کہا گیا ہے کہ مشرق وسطیٰ کی صورتحال پہلے ہی کشیدہ ہے اور امریکا مسلسل اسرائیل کی فوجی مدد کر رہا ہے۔ اسی پس منظر میں امریکی کارگو طیاروں کی آمد کو ایک اہم اور غیر معمولی پیش رفت کے طور پر دیکھا جا رہا ہے۔
تاحال امریکا اور اسرائیل کی جانب سے ان اطلاعات پر کوئی باضابطہ بیان جاری نہیں کیا گیا تاہم سیاسی و دفاعی ماہرین کا ماننا ہے کہ خطے میں بڑھتی ہوئی کشیدگی کسی بھی وقت خطرناک رخ اختیار کر سکتی ہے۔
دوسری طرف ایران ماضی میں بھی خبردار کر چکا ہے کہ اگر اس پر کسی قسم کا حملہ یا دباؤ ڈالنے کی کوشش کی گئی تو اس کا بھرپور جواب دیا جائے گا، جس کے باعث پورے خطے میں غیر یقینی صورتحال مزید بڑھتی دکھائی دے رہی ہے۔