وزیر اعلیٰ پنجاب مریم نواز شریف نے آذربائیجان کے دارالحکومت باکو میں اقوام متحدہ اربن فورم کے موقع پر پنجاب اور پاکستان کی نمائندگی کی اور سرکاری پریذیڈنشل ڈیلیگیٹس فوٹو اور صدارتی خطاب کی تقریب میں شرکت کی، جس میں آذربائیجان کے صدر الہام علییف بھی موجود تھے۔
یہ موقع عالمی سطح پر پنجاب کے وژن کو اجاگر کرنے کے لیے اہم قرار دیا جا رہا ہے، جس میں محفوظ، پائیدار اور لچکدار شہری ترقی کے اہداف پیش کیے گئے۔
باکو میں ہونے والے اس فورم کے موقع پر وزیراعلیٰ پنجاب نے متعدد عالمی رہنماؤں سے ملاقاتیں بھی کیں۔ ان میں بلغاریہ کے صدر رومن رادیف، کرغزستان کے صدر سادیر جاپاروف، ازبکستان کے صدر شوکت مرزیایوف اور جارجیا کے وزیراعظم ایراکلی کوباخیدزے شامل تھے۔
ان ملاقاتوں میں شہری ترقی، جدید انفراسٹرکچر، اور عوام دوست اربن پالیسیوں کے فروغ پر تفصیلی تبادلہ خیال کیا گیا۔ شرکاء نے اس بات پر اتفاق کیا کہ عالمی شراکت داریوں کو مزید مضبوط بنا کر پائیدار اور جدید شہری نظاموں کی تشکیل کو فروغ دیا جائے گا۔