بھارتی ریاست مہاراشٹر کے ضلع پالگھر میں ممبئی احمد آباد قومی شاہراہ پر ایک خوفناک ٹریفک حادثے میں 13 افراد ہلاک اور 25 زخمی ہوگئے۔
حادثہ اس وقت پیش آیا جب منگنی کی تقریب میں شرکت کے لیے جانے والے مسافروں سے بھری ایک بس مخالف سمت سے آتے ہوئے سامنے سے گزرنے والے ٹرک سے ٹکرا گئی۔
میڈیا رپورٹس کے مطابق بس میں 40 سے زائد مسافر سوار تھے جو باپو گاؤں سے دھنیوری میں ایک منگنی کی تقریب میں جارہے تھے کہ ہائی وے پر غلط سمت سے آنے کی وجہ سے ٹرک سے جا ٹکرائی۔
اس شدید تصادم کی زد میں ایک موٹرسائیکل بھی آگئی۔ حادثے کے نتیجے میں 13 افراد موقع پر ہی دم توڑ گئے جبکہ 25 مسافر زخمی ہوئے جنہیں اسپتال منتقل کردیا گیا ہے۔
ریاست مہاراشٹر کے وزیراعلیٰ نے اس اندوہناک واقعے پر گہرے دکھ کا اظہار کرتے ہوئے ہلاک ہونے والے افراد کے اہلخانہ کے لیے 5 لاکھ روپے معاوضے کا اعلان کیا ہے۔