سوئی سدرن گیس کمپنی نے چاند رات اور عید الاضحیٰ کے تینوں دن گیس لوڈشیڈنگ کا سلسلہ برقرار رکھنے کا فیصلہ کرتے ہوئے عید کے ایام کے لیے گیس کی فراہمی کا نیا شیڈول جاری کردیا ہے۔
شیڈول کے مطابق، سوئی سدرن عید کے دنوں میں بھی رات 12:00 بجے سے صبح 7:30 بجے تک گیس کی فراہمی مکمل طور پر بند رکھے گی۔ چاند رات یعنی 26 مئی کو سحری کے وقت رات 3:00 بجے سے صبح 10:00 بجے تک گیس فراہم کی جائے گی، جس کے بعد منگل کے روز دوپہر 12:00 بجے سے رات 12:00 بجے تک گیس دستیاب رہے گی۔
ترجمان سوئی سدرن کے مطابق، بدھ 27 مئی کو عید کے پہلے دن اور جمعرات 28 مئی کو عید کے دوسرے دن صبح 7:30 بجے سے رات 12:00 بجے تک گیس کی سپلائی بلاتعطل بحال رکھی جائے گی۔
اسی طرح عید کے تیسرے دن یعنی جمعہ 29 مئی کو صبح 7:30 بجے سے رات 10:00 بجے تک صارفین کو گیس دستیاب ہوگی۔ عید کے تعطل کے بعد ہفتہ 30 مئی سے گیس کی سپلائی دوبارہ اپنے پرانے شیڈول پر واپس چلی جائے گی اور صارفین کو گیس صرف کھانے کے مخصوص اوقات میں ہی فراہم کی جائے گی۔