امریکی صدر ڈونلڈ ٹرمپ نے کہا ہے کہ ایران کی صورتحال تیزی سے تبدیل ہو رہی ہے اور انہیں امید ہے کہ اس کے نتائج مثبت اور حوصلہ افزا ہوں گے۔
ایک بیان میں صدر ٹرمپ نے کہا کہ ایران اس بات پر متفق ہے کہ وہ جوہری ہتھیار حاصل نہیں کرے گا۔ ان کے مطابق انہیں بتایا گیا ہے کہ جاری مذاکرات میں ایرانی سپریم لیڈر کی رضامندی بھی شامل ہے، جبکہ مستقبل میں ایرانی سپریم لیڈر سے ملاقات کا امکان بھی موجود ہے۔
امریکی صدر کا کہنا تھا کہ امریکا نے ایران کی فضائیہ، بحریہ اور دفاعی نظام کو شدید نقصان پہنچایا ہے، جس کے باعث اس وقت زمینی فوج بھیجنے کی ضرورت محسوس نہیں ہوتی۔
انہوں نے کہا کہ ایران کے ساتھ تنازع کے خاتمے سے عالمی توانائی منڈیوں میں استحکام آئے گا اور پیٹرولیم مصنوعات کی قیمتوں میں کمی واقع ہوگی۔ ان کے بقول مستقبل قریب میں پیٹرول کی قیمتیں مزید نیچے آسکتی ہیں۔
ڈونلڈ ٹرمپ نے اسرائیلی وزیراعظم بنیامین نیتن یاہو سے سخت اور غصے بھرے انداز میں گفتگو کرنے کا اعتراف بھی کیا۔ انہوں نے کہا کہ وہ لبنان پر اسرائیلی حملے کے باعث پریشان تھے، جس کی وجہ سے نیتن یاہو سے سخت لہجے میں بات کی گئی۔