محکمہ داخلہ سندھ نے سوشل میڈیا پر مارکیٹوں، ریسٹورنٹس، فوڈ آؤٹ لیٹس اور شادی ہالز کے اوقاتِ کار کی تبدیلی کے حوالے سے گردش کرنے والے ایک نوٹیفکیشن کو جعلی قرار دیتے ہوئے اس کی سخت تردید کی ہے۔
ترجمان محکمہ داخلہ سندھ کی جانب سے 3 جون 2026 کو جاری کردہ ایک وضاحتی بیان میں واضح کیا گیا ہے کہ محکمے نے اوقاتِ کار کے حوالے سے ایسا کوئی نوٹیفکیشن جاری نہیں کیا، لہٰذا عوام، تاجر برادری، ریسٹورنٹ مالکان اور شادی ہالز کی انتظامیہ سوشل میڈیا پر وائرل ہونے والی ان غیر مصدقہ اور جھوٹی اطلاعات پر بالکل یقین نہ کریں۔
ترجمان نے مزید تنبیہ کی ہے کہ اس طرح کا جعلی نوٹیفکیشن بنانے اور اسے سوشل میڈیا پر پھیلانے والے عناصر کے خلاف قانون کے مطابق سخت کارروائی عمل میں لائی جائے گی۔
بیان میں یاد دہانی کرائی گئی ہے کہ کوئی بھی سرکاری نوٹیفکیشن صرف اور صرف محکمہ داخلہ سندھ کے مجاز و سرکاری ذرائع سے ہی جاری کیا جاتا ہے۔