سندھ کے سینئر وزیر شرجیل انعام میمن کی زیر صدارت محکمہ ٹرانسپورٹ و ماس ٹرانزٹ کا اہم اجلاس منعقد ہوا، جس میں ٹرانسپورٹرز کی سہولت اور نظام کی ڈیجیٹائزیشن سے متعلق متعدد اہم فیصلے کیے گئے۔
اجلاس میں فیصلہ کیا گیا کہ نیو سبزی منڈی کراچی میں ٹرانسپورٹرز کے لیے خصوصی ون ونڈو فیسلیٹیشن ڈیسک قائم کیا جائے گا، جس کا مقصد شہر میں آنے والی مال بردار گاڑیوں کو روٹ پرمٹ، فٹنس سرٹیفکیٹس اور دیگر ضروری دستاویزات کے اجرا اور تجدید میں سہولت فراہم کرنا ہے۔
سینئر وزیر شرجیل انعام میمن نے کہا کہ اس اقدام کا بنیادی مقصد 30 جون 2026 تک زیادہ سے زیادہ کمرشل اور مال بردار گاڑیوں کو حکومت سندھ کے ڈیجیٹل اور آٹومیشن نظام میں شامل کرنا ہے تاکہ قانونی تقاضوں کی بروقت اور شفاف تکمیل کو یقینی بنایا جاسکے۔
انہوں نے کہا کہ اس نظام کے ذریعے نہ صرف ٹرانسپورٹرز کو بہتر سہولتیں میسر آئیں گی بلکہ مالی سال 2025-26 کے اہداف بھی مؤثر انداز میں حاصل کیے جاسکیں گے۔