وفاقی حکومت نے سرکاری اخراجات میں کمی اور انتظامی امور کو مزید مؤثر بنانے کے لیے کفایت شعاری مہم کو تیز کرنے کا فیصلہ کر لیا ہے۔ ذرائع کے مطابق رائٹ سائزنگ پالیسی کے تحت مختلف وفاقی وزارتوں کے انضمام اور غیر ضروری وزارتوں کے خاتمے سے متعلق تجاویز پر تیزی سے غور جاری ہے۔
ذرائع کا کہنا ہے کہ حکومت کابینہ کے حجم میں کمی کے لیے اہم انتظامی اقدامات پر غور کر رہی ہے، جبکہ متعدد وزارتوں کو دیگر وزارتوں میں ضم کرنے یا مکمل طور پر ختم کرنے کے حوالے سے حتمی فیصلہ پارٹی قیادت کی مشاورت سے کیا جائے گا۔
ذرائع کے مطابق غیر اہم وزارتوں میں تعینات وزرائے مملکت کی ذمہ داریوں کو بھی محدود کرنے کی تجویز زیر غور ہے، جبکہ آئندہ صرف اہم وزارتوں میں ہی وزرائے مملکت رکھنے کی پالیسی اپنائے جانے کا امکان ہے۔
حکومتی ذرائع کا مزید کہنا ہے کہ مجوزہ اصلاحات کی منظوری کے بعد وفاقی کابینہ کی نئی ساخت ترتیب دی جائے گی، جو آئندہ ڈھائی سال کے حکومتی دورانیے کے لیے نافذ العمل ہوسکتی ہے۔ ان اقدامات کا مقصد حکومتی اخراجات میں کمی، انتظامی کارکردگی میں بہتری اور وسائل کے مؤثر استعمال کو یقینی بنانا ہے۔