موٹروے پولیس نے اعلان کیا ہے کہ موٹرویز پر گاڑیوں کے لیے رفتار کی سابقہ حد دوبارہ نافذ کر دی گئی ہے۔ نئے اعلامیے کے مطابق کاریں اب 120 کلومیٹر فی گھنٹہ کی رفتار سے سفر کر سکیں گی، جبکہ مسافر بسوں اور دیگر بھاری گاڑیوں کے لیے رفتار کی حد 110 کلومیٹر فی گھنٹہ مقرر کردی گئی ہے۔
پولیس ترجمان کے مطابق قومی شاہراہوں پر بھی مختلف نوعیت کی گاڑیوں کے لیے پہلے سے مقرر کردہ رفتار کی حدیں بحال کر دی گئی ہیں اور تمام ڈرائیورز کو ان پر عمل کرنا ہوگا۔
حکام کا کہنا ہے کہ بعض خصوصی حالات اور حفاظتی تقاضوں کے باعث رفتار کی حد میں عارضی طور پر کمی کی گئی تھی، تاہم اب حالات معمول پر آنے کے بعد سابقہ قواعد دوبارہ نافذ کر دیے گئے ہیں۔
موٹروے پولیس نے مسافروں اور ڈرائیورز پر زور دیا ہے کہ سفر کے دوران مقررہ رفتار سے تجاوز نہ کریں اور ٹریفک قوانین کی مکمل پاسداری کریں تاکہ سڑک حادثات کے خطرات کو کم کیا جاسکے۔