امریکی صدر ڈونلڈ ٹرمپ نے کہا ہے کہ آبنائے ہرمز مکمل طور پر کھلی ہوئی ہے اور ایران اس معاملے میں مثبت کردار ادا کر رہا ہے۔
وائٹ ہاؤس میں میڈیا سے گفتگو کرتے ہوئے ڈونلڈ ٹرمپ کا کہنا تھا کہ آبنائے ہرمز میں بحری سرگرمیاں معمول کے مطابق جاری ہیں۔ انہوں نے خبردار کیا کہ اگر ایران کسی معاہدے کی خلاف ورزی کرتا ہے تو امریکا ضروری اقدامات کرے گا۔
انہوں نے کہا کہ جب تک ایران امریکا کے ساتھ احترام پر مبنی رویہ اختیار کیے رکھے گا، دونوں ممالک کے درمیان کسی نئے تنازع یا کشیدگی کا امکان نہیں ہوگا۔
ڈونلڈ ٹرمپ نے مزید دعویٰ کیا کہ ایران بالآخر بڑے پیمانے پر ہتھیاروں کے معائنے کی اجازت دینے پر آمادہ ہو جائے گا اور مستقبل میں اپنی جوہری سرگرمیوں کے حوالے سے طویل مدت تک شفافیت برقرار رکھنے پر بھی رضامند ہوگا۔