"اللہ رکھا پیپسی ایک باصلاحیت اور خوددار فنکار تھے۔ میں نے اپنی زندگی میں اتنی خودداری کم لوگوں میں دیکھی ہے۔ وہ مالی مشکلات کے باوجود کبھی کسی کے سامنے ہاتھ نہیں پھیلاتے تھے۔ اپنی بیٹی کی زندگی کے باعث وہ بہت پریشان رہتے تھے۔ ان کے داماد کی مسلسل مالی مطالبات نے انہیں ذہنی طور پر توڑ کر رکھ دیا تھا۔ تدفین کے وقت مجھے معلوم ہوا کہ اسی روز ان کی بیٹی کو طلاق بھی ہو گئی تھی۔ میرا خیال ہے یہ صدمہ ان پر بہت بھاری گزرا۔ انہیں دل کا عارضہ بھی تھا، مگر وہ علاج کرانے پر آمادہ نہیں ہوتے تھے۔"
سینئر اداکار اور کامیڈین سہیل احمد نے مرحوم کامیڈین اللہ رکھا پیپسی کی اچانک وفات سے متعلق ایک دلخراش پہلو بیان کرتے ہوئے ان کی نجی زندگی کی مشکلات پر روشنی ڈالی۔
اپنے پروگرام میں گفتگو کرتے ہوئے سہیل احمد نے کہا کہ اللہ رکھا پیپسی اپنی فنکارانہ صلاحیتوں کے ساتھ غیر معمولی خودداری کے لیے بھی جانے جاتے تھے۔ شدید مالی مشکلات کے باوجود انہوں نے کبھی کسی سے مدد طلب نہیں کی، تاہم اپنی بیٹی کے گھریلو مسائل انہیں مسلسل ذہنی دباؤ میں رکھے ہوئے تھے۔
سہیل احمد کے مطابق اللہ رکھا پیپسی اکثر بتایا کرتے تھے کہ ان کے داماد کی مسلسل مالی فرمائشوں نے انہیں سخت پریشان کر رکھا ہے اور وہ ان مطالبات کو پورا کرتے کرتے بے بس ہو چکے تھے۔ ان کا کہنا تھا کہ یہ صورتحال ان کے لیے شدید ذہنی اذیت کا باعث بن گئی تھی۔
انہوں نے مزید انکشاف کیا کہ اللہ رکھا پیپسی کی تدفین کے دوران ایک شخص نے انہیں بتایا کہ اسی روز ان کی بیٹی کو طلاق بھی دی گئی تھی۔ سہیل احمد کا کہنا تھا کہ ممکن ہے یہ خبر ان تک شو کی ریکارڈنگ سے پہلے پہنچ گئی ہو، جس نے ان کی ذہنی کیفیت پر گہرا اثر ڈالا ہو۔
واضح رہے کہ 6 جولائی 2026 کو اللہ رکھا پیپسی نجی ٹی وی کے مزاحیہ پروگرام کی ریکارڈنگ کے دوران اچانک گر پڑے تھے۔ بعد ازاں تصدیق ہوئی کہ انہیں دل کا دورہ پڑا تھا اور وہ موقع پر ہی انتقال کرگئے۔ سہیل احمد کے مطابق مرحوم کچھ عرصے سے دل کے عارضے میں مبتلا تھے، لیکن علاج کرانے سے گریز کر رہے تھے۔