بروقت ٹیکس گوشوارے جمع نہ کرانے کے باعث نان فائلر ہونے والے شہریوں کے لیے فائلر اسٹیٹس بحال کرانے اور 25 ہزار روپے جرمانے سے بچنے کا طریقہ کار جاری کردیا گیا۔
جاری کردہ طریقہ کار کے مطابق انفرادی ٹیکس دہندگان اور واحد ملکیتی کاروبار کرنے والے افراد آئی آر آئی ایس 2.0 پورٹل کے ذریعے فارم اے ٹی ایل-یو جمع کروا کر دوبارہ ایکٹو ٹیکس پیئر لسٹ (اے ٹی ایل) میں شامل ہوسکتے ہیں۔
طریقہ کار کے تحت شناختی کارڈ پر رجسٹرڈ کاروبار کو قانونی طور پر انفرادی کاروبار تصور کیا جائے گا۔ ٹیکس دہندگان اپنے ذاتی آئی آر آئی ایس 2.0 اکاؤنٹ میں لاگ اِن کرکے ڈیکلریشن ٹیب یا ٹاسک بار میں فارم اے ٹی ایل-یو تلاش کریں گے اور متعلقہ ٹیکس سال منتخب کرکے درخواست جمع کروائیں گے۔
فارم جمع کرانے سے قبل ٹیکس دہندگان کے لیے فراہم کردہ انڈرٹیکنگ کا مطالعہ اور ڈیجیٹل دستخط کرنا لازمی ہوگا۔ انڈرٹیکنگ کے تحت درخواست گزار آئندہ چھ ماہ تک کسی جائیداد کی خریداری، حصول یا ملکیت کا حق حاصل نہیں کرسکے گا۔
طریقہ کار کے مطابق فارم اے ٹی ایل-یو کامیابی سے جمع ہونے پر ٹیکس دہندہ کا فائلر اسٹیٹس خودکار طور پر بحال ہوجائے گا، جبکہ مقررہ شرائط پوری کرنے والے شہری 25 ہزار روپے کے جرمانے سے بھی محفوظ رہ سکیں گے۔