عالمی منڈی میں خام تیل کی قیمتوں میں اضافے کے باعث آئندہ 15 روزہ جائزے میں پاکستان میں پیٹرولیم مصنوعات کی قیمتوں میں نمایاں اضافے کا امکان ظاہر کیا جا رہا ہے۔
ذرائع کے مطابق ہائی اسپیڈ ڈیزل کی قیمت میں 40 روپے فی لیٹر تک جبکہ پیٹرول کی قیمت میں تقریباً 10 روپے فی لیٹر اضافے کی تجویز زیر غور ہے۔ تاہم صارفین پر بوجھ کم رکھنے کے لیے حکومت کی جانب سے پیٹرولیم لیوی میں کمی کا آپشن بھی زیر غور بتایا جا رہا ہے۔
اطلاعات کے مطابق ایران اور امریکا کے درمیان حالیہ کشیدگی کے بعد عالمی مارکیٹ میں خام تیل کی قیمتیں بڑھنے سے مقامی سطح پر بھی پیٹرولیم مصنوعات مہنگی ہونے کا امکان پیدا ہوا ہے۔
دوسری جانب حکومت نے پیٹرولیم مصنوعات کی مصنوعی قلت پیدا کرنے اور ذخیرہ اندوزی کے خلاف سخت اقدامات کی ہدایت جاری کر دی ہے۔ نیشنل کمیٹی آن مانیٹرنگ اینڈ کوآرڈینیشن نے بعض عناصر کی جانب سے مبینہ ذخیرہ اندوزی کا سخت نوٹس لیتے ہوئے اوگرا کو متعلقہ قوانین کے تحت فوری اور مؤثر کارروائی کی ہدایت کی ہے۔
واضح رہے کہ پیٹرولیم مصنوعات کی نئی قیمتوں کا باضابطہ اعلان حکومت کی جانب سے آئندہ جائزے کے بعد کیا جائے گا جس کے بعد ہی حتمی نرخ نافذ ہوں گے۔