سیکیورٹی فورسز نے خیبرپختونخوا اور بلوچستان میں انٹیلی جنس اطلاعات کی بنیاد پر دہشتگردوں کے خلاف کامیاب کارروائیاں کرتے ہوئے گزشتہ 24 گھنٹوں کے دوران مجموعی طور پر 32 دہشتگردوں کو ہلاک کردیا۔
پاک فوج کے شعبۂ تعلقاتِ عامہ (آئی ایس پی آر) کے مطابق 28 اور 29 جولائی کی درمیانی شب ضلع خیبر کے مختلف علاقوں میں ایریا سینیٹائزیشن اور ٹارگٹڈ آپریشنز کیے گئے۔ کارروائیوں کے دوران دہشتگردوں کے متعدد ٹھکانوں کو نشانہ بنایا گیا، جس کے نتیجے میں فتنہ الخوارج سے تعلق رکھنے والے 24 دہشتگرد مارے گئے۔
آئی ایس پی آر کے مطابق بلوچستان کے ضلع نوشکی میں بھی انٹیلی جنس کی بنیاد پر کئی کارروائیاں عمل میں لائی گئیں۔ شدید فائرنگ کے تبادلے کے بعد فتنہ الہندوستان سے وابستہ 8 دہشتگرد ہلاک کر دیے گئے۔
بیان میں کہا گیا کہ آپریشنز کے دوران دہشتگردوں کے قبضے سے اسلحہ، گولہ بارود اور دیسی ساختہ دھماکہ خیز مواد برآمد کرکے تباہ کر دیا گیا، جبکہ متاثرہ علاقوں میں مزید دہشتگردوں کی موجودگی کے پیش نظر سینیٹائزیشن آپریشنز جاری ہیں۔
آئی ایس پی آر نے اپنے بیان میں کہا کہ وفاقی ایپکس کمیٹی برائے نیشنل ایکشن پلان سے منظور شدہ وژن ”عزمِ استحکام“ کے تحت دہشتگردی کے خلاف کارروائیاں پوری قوت سے جاری رہیں گی۔
بیان کے مطابق پاکستان کی سیکیورٹی فورسز اور قانون نافذ کرنے والے ادارے بیرونی سرپرستی میں سرگرم دہشتگرد عناصر کے مکمل خاتمے تک اپنی کارروائیاں بلا تعطل جاری رکھیں گے۔