پاکستان کے معروف اداکار اور میزبان فیصل قریشی ایک بار پھر سوشل میڈیا پر موضوعِ بحث بن گئے ہیں تاہم اس بار وجہ ان کی نئی ڈرامہ سیریز نہیں بلکہ ان کی تیزی سے کم ہوتی ہوئی جسمانی ساخت ہے۔ اگرچہ ابتدا میں مداحوں نے ان کی فٹنس ٹرانسفارمیشن کو خوب سراہا لیکن اب بہت سے لوگ ان کے مسلسل کم ہوتے وزن پر تشویش کا اظہار کر رہے ہیں۔
فیصل قریشی گزشتہ کئی دہائیوں سے پاکستان کی شوبز انڈسٹری کا نمایاں نام ہیں۔ انہوں نے "میری ذات ذرۂ بے نشاں"، "میں عبدالقادر ہوں"، "بشر مومن"، "مقدر"، "کھائی"، "حیوان"، "فرق"، "ہک"، "بہروپیا"، "بھیگی پلکیں" اور "فتور" جیسے کامیاب ڈراموں میں یادگار کردار ادا کیے۔ حال ہی میں ڈرامہ "کیس نمبر 9" میں کامران کے کردار نے بھی انہیں شائقین کی بھرپور داد دلوائی۔
حالیہ دنوں میں فیصل قریشی مختلف عوامی تقریبات میں نظر آئے جہاں ان کی نئی ویڈیوز سوشل میڈیا پر تیزی سے وائرل ہو گئیں۔ ان ویڈیوز میں وہ پہلے کے مقابلے میں خاصے دبلے دکھائی دے رہے ہیں جبکہ ان کے چہرے کی ہڈیاں نمایاں ہونے اور گال اندر دھنسے ہوئے محسوس ہونے پر مداحوں نے تشویش کا اظہار کیا۔
سوشل میڈیا پر متعدد صارفین نے ان کی صحت کے بارے میں سوالات اٹھائے ہیں۔ کچھ مداحوں کا کہنا ہے کہ فیصل قریشی کو اب مزید وزن کم کرنے سے گریز کرنا چاہیے جبکہ بعض نے امید ظاہر کی کہ وہ خیریت سے ہوں۔ ایک ترک مداح نے بھی ان کی صحت کے لیے نیک خواہشات کا اظہار کیا۔
دوسری جانب چند سوشل میڈیا صارفین نے بغیر کسی ثبوت کے یہ قیاس آرائیاں بھی کیں کہ شاید انہوں نے وزن کم کرنے کے لیے اوزیمپک کا استعمال کیا ہو۔ تاہم فیصل قریشی نے اب تک اپنے وزن میں نمایاں کمی یا اس حوالے سے سامنے آنے والے تبصروں پر کوئی ردعمل نہیں دیا۔