وفاقی وزیر داخلہ محسن نقوی سے خیبر پختونخوا اور بلوچستان کے تاجروں اور صنعتکاروں کے وفد نے ملاقات کی جس میں سیکیورٹی صورتحال، کاروباری سرگرمیوں کو درپیش مشکلات اور دیگر اہم مسائل پر تفصیلی تبادلہ خیال کیا گیا۔
ملاقات کے دوران تاجر برادری نے وزیر داخلہ کو اپنے مسائل اور سیکیورٹی سے متعلق خدشات سے آگاہ کیا۔ اس موقع پر محسن نقوی نے تاجروں اور صنعتکاروں کے جان و مال کے تحفظ اور ان کے مسائل کے حل کے لیے حکومت کے عزم کا اعادہ کرتے ہوئے کہا کہ ملک میں محفوظ کاروباری ماحول کی فراہمی اور نجی شعبے کا فروغ حکومت کی اولین ترجیحات میں شامل ہے۔
وفاقی وزیر داخلہ نے اعلان کیا کہ وہ جلد پشاور اور کوئٹہ کے دورے کریں گے، جہاں متعلقہ حکام، تاجر تنظیموں اور دیگر اسٹیک ہولڈرز سے مشاورت کے ذریعے مسائل کے مستقل اور مؤثر حل کے لیے اقدامات کیے جائیں گے۔
انہوں نے اس بات پر زور دیا کہ حکومت کاروباری برادری کو درپیش مشکلات کے خاتمے اور سرمایہ کاری کے لیے سازگار ماحول کی فراہمی کے لیے ہر ممکن اقدامات جاری رکھے گی۔