ایران کے وزیر خارجہ عباس عراقچی نے امریکا کو خبردار کرتے ہوئے کہا ہے کہ وہ کسی بھی قسم کی مہم جوئی یا جارحانہ اقدام سے گریز کرے، کیونکہ ایران ہر ممکن جارحیت کا بھرپور اور فیصلہ کن جواب دینے کے لیے تیار ہے۔
غیرملکی میڈیا کے مطابق عباس عراقچی نے سعودی عرب اور ترکی کے وزرائے خارجہ سے ٹیلیفونک رابطے کیے، جن میں خطے کی موجودہ صورتحال اور سیکیورٹی امور پر تبادلہ خیال کیا گیا۔
ایرانی وزیر خارجہ نے گفتگو کے دوران واضح کیا کہ اگر امریکا نے کسی بھی قسم کی مہم جوئی کی تو ایران سخت ردعمل دے گا اور اپنی خودمختاری کے دفاع کے لیے ہر ضروری اقدام اٹھائے گا۔
عباس عراقچی نے بعد ازاں بتایا کہ انہوں نے پاکستان کے فیلڈ مارشل عاصم منیر سے بھی ٹیلیفون پر گفتگو کی، جس میں باہمی دلچسپی کے امور اور خطے کی مجموعی صورتحال پر تبادلہ خیال کیا گیا۔