پاک فوج کے شعبۂ تعلقاتِ عامہ (آئی ایس پی آر) کے مطابق یومِ استحصالِ کشمیر کے موقع پر فیلڈ مارشل سید عاصم منیر، چیف آف آرمی اسٹاف و چیف آف ڈیفنس فورسز، ایڈمرل نوید اشرف، چیف آف دی نیول اسٹاف، ایئر چیف مارشل ظہیر احمد بابر سدھو، چیف آف دی ایئر اسٹاف، اور پاکستان کی مسلح افواج نے بھارتی غیر قانونی زیرِ تسلط جموں و کشمیر کے عوام کے ساتھ اپنی غیر متزلزل یکجہتی کا اعادہ کیا ہے۔
آئی ایس پی آر کے بیان میں کہا گیا ہے کہ پاکستان کی مسلح افواج کشمیری عوام کی اس جائز جدوجہد کی مکمل حمایت جاری رکھیں گی جس کا مقصد بین الاقوامی قانون اور اقوامِ متحدہ کی سلامتی کونسل کی متعلقہ قراردادوں کے مطابق ان کے ناقابلِ تنسیخ حقِ خودارادیت کا حصول ہے۔
بیان میں بھارتی غیر قانونی زیرِ تسلط جموں و کشمیر میں بھارتی سیکیورٹی فورسز کی جانب سے جاری فوجی محاصرے، انسانی حقوق کی مبینہ سنگین خلاف ورزیوں اور آبادی کے تناسب کو تبدیل کرنے کی کوششوں پر شدید تشویش کا اظہار کرتے ہوئے کہا گیا کہ ایسے اقدامات، اشتعال انگیز بیانات اور جارحانہ طرزِ عمل نہ صرف خطے کے امن و استحکام کے لیے خطرہ ہیں بلکہ انسانی مصائب میں بھی اضافہ کر رہے ہیں۔
آئی ایس پی آر کے مطابق جنوبی ایشیا میں پائیدار امن اور استحکام کا انحصار مسئلہ جموں و کشمیر کے منصفانہ اور پُرامن حل پر ہے، جو کشمیری عوام کی خواہشات اور اقوامِ متحدہ کی سلامتی کونسل کی متعلقہ قراردادوں کے مطابق ہونا چاہیے۔
بیان کے اختتام پر پاکستان کے عوام اور مسلح افواج نے بھارتی غیر قانونی زیرِ تسلط جموں و کشمیر کے شہداء کو خراجِ عقیدت پیش کرتے ہوئے اس عزم کا اعادہ کیا کہ وہ کشمیری عوام کی جائز اور برحق جدوجہدِ آزادی میں ہر سطح پر ان کے شانہ بشانہ کھڑے رہیں گے۔