ٹیکس سال 2026 کے ریٹرن فارم کو تاحال حتمی شکل نہ دیے جانے پر کراچی ٹیکس بار ایسوسی ایشن نے تشویش کا اظہار کرتے ہوئے ایف بی آر سے ریٹرن فارم میں موجود خامیاں فوری دور کرنے کا مطالبہ کیا ہے۔
کراچی ٹیکس بار ایسوسی ایشن نے ایف بی آر کو چار صفحات پر مشتمل خط ارسال کیا ہے جس میں ٹیکس ریٹرن کے عمل کو آسان اور مؤثر بنانے کے لیے مختلف تجاویز پیش کی گئی ہیں۔
خط میں مطالبہ کیا گیا ہے کہ آئی آر آئی ایس پر ٹیکس سال 2026 کے لیے ریفنڈ درخواست اور ریٹرن ایکنالجمنٹ کی سہولت فوری فعال کی جائے۔ ٹیکس ریٹرن میں سابقہ ویلتھ اسٹیٹمنٹ اور کیری فارورڈ سرمایہ کا ڈیٹا خودکار طور پر منتقل کرنے کی سہولت بھی فراہم کی جائے۔
کراچی ٹیکس بار نے بڑی مقدار میں ڈیٹا درج کرنے والے ٹیکس دہندگان کے لیے ایکسل فائل اپ لوڈ کی سہولت متعارف کرانے کی تجویز بھی دی ہے۔
ایسوسی ایشن نے ٹیکس سال 2026 کے ریٹرن میں ترمیم کی سہولت بحال کرنے پر بھی زور دیتے ہوئے کہا ہے کہ ریٹرن فارم کو ٹیکس دہندگان اور ٹیکس ماہرین کے لیے زیادہ آسان، شفاف اور صارف دوست بنایا جائے۔