پاکستان نے مقبوضہ مغربی کنارے میں بگڑتی صورتحال پر شدید تشویش کا اظہار کرتے ہوئے فلسطینی شہریوں کو فوری اور مؤثر بین الاقوامی تحفظ فراہم کرنے کا مطالبہ کردیا۔
اقوام متحدہ میں پاکستان کے مستقل مندوب عاصم افتخار نے سلامتی کونسل سے خطاب کرتے ہوئے کہا کہ مقبوضہ مغربی کنارے کی صورتحال تیزی سے خراب ہو رہی ہے، جس پر سلامتی کونسل کو فوری اور مؤثر اقدامات کرنے کی ضرورت ہے۔
عاصم افتخار کا کہنا تھا کہ اسرائیل کے غیر قانونی اقدامات کا مقصد قبضے کو مزید مستحکم کرنا ہے جبکہ اسرائیلی آبادکاری میں توسیع تشویشناک حد تک پہنچ چکی ہے۔ دیگر علاقوں میں نئی آبادکاری فلسطینی سرزمین کو تقسیم کرنے کی منظم کوشش ہے۔
پاکستانی مندوب نے آبادکاروں کے تشدد کی فوری روک تھام اور اس میں ملوث عناصر کو قانون کے مطابق جوابدہ بنانے پر زور دیا۔
انہوں نے مسجد اقصیٰ میں اشتعال انگیز کارروائیوں پر بھی پاکستان کی گہری تشویش کا اظہار کرتے ہوئے کہا کہ فلسطینیوں کو بین الاقوامی تحفظ فراہم کیا جانا چاہیے۔
عاصم افتخار نے سلامتی کونسل پر زور دیا کہ یونیسیف کی سفارشات پر عملدرآمد یقینی بنایا جائے تاکہ فلسطینی بچوں اور شہریوں کے تحفظ کے لیے مؤثر اقدامات کیے جا سکیں۔