سندھ کے ضلع دادو کے علاقے میہڑ میں خستہ حال گرلز پرائمری اسکول کی چھت کے چاپڑ گرنے سے 10 سے زائد طلبہ زخمی ہوگئے۔
واقعہ میہڑ کے نواحی گاؤں سانول کرٹیو میں پیش آیا، جہاں گرلز پرائمری اسکول کی بوسیدہ عمارت کی چھت کا ایک حصہ اچانک گر گیا۔ حادثے کے نتیجے میں اسکول میں موجود متعدد طلبہ زخمی ہوئے، جنہیں فوری طور پر ہسپتال منتقل کردیا گیا۔
ریسکیو حکام کے مطابق زخمی طلبہ کو ہسپتال میں طبی امداد فراہم کی جا رہی ہے۔ زخمیوں میں عائشہ، رحمت، دعا، زویا، ایان علی سمیت دیگر طلبہ شامل ہیں۔
علاقہ مکینوں کا کہنا ہے کہ اسکول کی عمارت طویل عرصے سے خستہ حالی کا شکار تھی، تاہم اس کے باوجود طلبہ کی تعلیم کا سلسلہ جاری تھا۔ چھت کا حصہ گرنے سے طلبہ میں شدید خوف و ہراس پھیل گیا۔
مقامی افراد نے مطالبہ کیا ہے کہ خستہ حال اسکول کی عمارت کی فوری مرمت یا نئی عمارت تعمیر کی جائے تاکہ مستقبل میں ایسے حادثات سے بچا جا سکے۔