محکمہ موسمیات کے مطابق سندھ میں فی الحال مون سون بارشوں کا کوئی امکان نہیں ہے اور نہ ہی کوئی مون سون سسٹم صوبے پر اثرانداز ہوتا نظر آ رہا ہے۔
ترجمان کا کہنا ہے کہ اگست کے دوران سندھ میں معمول سے کم بارشیں متوقع ہیں، تاہم آج صوبے کے بیشتر علاقوں میں موسم گرم اور مرطوب رہے گا۔ دوسری جانب کراچی سمیت سندھ کی ساحلی پٹی اور ضلع تھرپارکر میں کہیں کہیں بوندا باندی ہوسکتی ہے۔
محکمہ موسمیات نے کراچی کے موسم سے متعلق بتایا ہے کہ آئندہ تین روز کے دوران شہر میں مطلع جزوی طور پر ابر آلود رہنے کے ساتھ ساتھ موسم مرطوب رہے گا، جبکہ صبح اور رات کے اوقات میں بوندا باندی کا امکان ہے۔ اس عرصے کے دوران شہر کا زیادہ سے زیادہ درجہ حرارت 32 سے 34 ڈگری سینٹی گریڈ کے درمیان ریکارڈ کیے جانے کی توقع ہے۔