چیئرمین پاکستان کرکٹ بورڈ محسن نقوی نے ملتان کے شہریوں سے نیشنل چیمپئن شپ کے میچز دیکھنے کے لیے اسٹیڈیم آنے کی درخواست کردی۔
محسن نقوی نے ایکس پر اپنے پیغام میں کہا کہ ملتان کرکٹ اسٹیڈیم میں آج رات یوم آزادی کی مناسبت سے تقریبات جاری ہیں، جبکہ میچ کے اختتام پر معروف گلوکار ندیم لونے والہ اپنے فن کا مظاہرہ کریں گے۔
انہوں نے کہا کہ ملتان کرکٹ اسٹیڈیم میں نیشنل چیمپئنز کپ کا پاکستان گرینز اور پاکستان بلیوز کے درمیان میچ جاری ہے، جس میں کرکٹ اسٹارز صاحبزادہ فرحان، عرفات منہاس، حسن علی، سفیان مقیم، فخر زمان، شاداب خان، فہیم اشرف اور نسیم شاہ ایکشن میں ہیں۔
چیئرمین پی سی بی نے شہریوں سے اپیل کی کہ وہ اپنے اہل خانہ کے ہمراہ اسٹیڈیم آئیں اور یوم آزادی کی تقریبات سے لطف اندوز ہوں۔
محسن نقوی نے کہا کہ تمام انکلوژرز میں داخلہ بالکل مفت رکھا گیا ہے اور ملتان کے شہریوں کو رات 10 بجے سرپرائز بھی دیا جائے گا۔
پی سی بی نے شائقین کرکٹ سے بھرپور شرکت کی اپیل کرتے ہوئے کہا ہے کہ یوم آزادی کی مناسبت سے اسٹیڈیم میں تقریبات کا انعقاد کیا جارہا ہے۔