گلگت بلتستان کے وزیراعلیٰ امجد حسین ایڈووکیٹ نے کہا ہے کہ قدرتی آفات سے متاثرہ خاندانوں کی بحالی اور انہیں محفوظ رہائش کی فراہمی حکومت کی ترجیحات میں شامل ہے، سندھ حکومت کے تعاون سے متاثرین کے لیے 200 گھر تعمیر کیے جارہے ہیں۔
وزیراعلیٰ گلگت بلتستان کو محکمہ پلاننگ اینڈ ڈویلپمنٹ کی جانب سے ڈونرز کے تعاون سے شروع کیے جانے والے 16 ارب روپے کے کلائمیٹ ریزیلینس پروجیکٹ کے حوالے سے تفصیلی بریفنگ دی گئی۔
بریفنگ میں بتایا گیا کہ منصوبے کے تحت گلگت بلتستان میں موسمیاتی تبدیلیوں اور قدرتی آفات کے اثرات سے نمٹنے کے لیے ماحول دوست اور محفوظ تعمیرات، صاف پانی کی فراہمی، سیوریج نظام اور آسان شرائط پر قرضوں سمیت مختلف منصوبے شروع کیے جائیں گے۔
امجد حسین ایڈووکیٹ نے کہا کہ گلگت بلتستان قدرتی آفات کے حوالے سے انتہائی حساس خطہ ہے، جہاں کلاؤڈ برسٹ اور سیلاب کے باعث ہر سال متعدد مکانات تباہ ہوجاتے ہیں۔ حکومت متاثرہ شہریوں کے لیے محفوظ اور پائیدار گھروں کی تعمیر کو یقینی بنائے گی۔
انہوں نے بتایا کہ وفاقی حکومت کے تعاون سے گزشتہ سال بوبر کے سیلاب متاثرین کے لیے ایک رہائشی کالونی قائم کی گئی تھی، جبکہ رواں سال سندھ حکومت کے تعاون سے قدرتی آفات سے متاثرہ خاندانوں کے لیے 200 گھر تعمیر کیے جارہے ہیں۔
وزیراعلیٰ نے کہا کہ مستقبل میں بھی قدرتی آفات سے متاثرہ افراد کی بحالی، محفوظ رہائش اور بنیادی سہولیات کی فراہمی کے لیے اقدامات کا سلسلہ جاری رکھا جائے گا۔