سیکیورٹی فورسز نے بلوچستان میں دہشت گردوں کے خلاف کارروائی کرتے ہوئے 2 دہشت گردوں کو ہلاک جبکہ 3 کو زخمی کردیا۔
سیکیورٹی ذرائع کے مطابق کلی زائیک کے علاقے میں دہشت گردوں کی موجودگی کی اطلاع پر انٹیلی جنس بیسڈ آپریشن کیا گیا۔ کارروائی بسیمہ کیمپ سے تقریباً 12 کلومیٹر شمال میں کلی زائیک اور کاغلی کے درمیان کی گئی۔
ذرائع کے مطابق آپریشن کے دوران سیکیورٹی فورسز اور دہشت گردوں کے درمیان فائرنگ کا تبادلہ ہوا، جس کے نتیجے میں 2 دہشت گرد ہلاک اور 3 زخمی ہوگئے۔
سیکیورٹی ذرائع کا کہنا ہے کہ ہلاک ہونے والے ایک دہشت گرد کی شناخت مشتاق احمد عرف کوہ یار کے نام سے ہوئی ہے۔
کارروائی کے دوران دہشت گردوں کے قبضے سے ایمونیشن، میگزین، دستی بم اور آئی ای ڈی کی تیاری میں استعمال ہونے والا سامان بھی برآمد کیا گیا۔
سیکیورٹی فورسز نے دہشت گردی کے مکمل خاتمے اور بلوچستان میں پائیدار امن کے قیام تک کارروائیاں بلا تعطل جاری رکھنے کے عزم کا اظہار کیا ہے۔