پاکستان پیپلز پارٹی کے رہنما سعید غنی نے سندھ میں نئے صوبے کے قیام کی مخالفت کرتے ہوئے کہا ہے کہ کسی بھی صورت سندھ کو تقسیم نہیں ہونے دیا جائے گا۔
سعید غنی کا کہنا تھا کہ زبردستی صوبہ بنانے کی کوشش کی گئی تو اس کے نتیجے میں عوام کے درمیان نفرت اور بداعتمادی پیدا ہوسکتی ہے۔ انہوں نے خبردار کیا کہ شہریوں کے ذہنوں میں بدگمانیاں پیدا ہوئیں تو صورتحال کے نتائج مختلف ہوسکتے ہیں۔
پی پی رہنما نے کہا کہ سیاسی قیادت کو ہوش کے ناخن لینے چاہئیں اور سندھ کے عوام کو نفرت کی طرف دھکیلنے سے گریز کرنا چاہیے۔ ان کے مطابق نئے صوبوں کے قیام کا فیصلہ سیاستدانوں اور پارلیمنٹ کا آئینی و سیاسی معاملہ ہے۔
سعید غنی نے دعویٰ کیا کہ سندھ کی بیشتر سیاسی جماعتیں اور عوام نئے صوبے کے قیام کے مخالف ہیں۔ انہوں نے ایم کیو ایم کو تنقید کا نشانہ بناتے ہوئے کہا کہ چند افراد کی جانب سے کیے جانے والے مطالبات کو سندھ کے عوام کی رائے قرار نہیں دیا جاسکتا۔