پاکستان ہاکی کے لیے ایک بڑی پیشرفت سامنے آ گئی ہے۔ پاکستان ہاکی فیڈریشن کے مطابق سال 2027 کی پہلی سہ ماہی میں "پاکستان ہاکی لیگ" کا باقاعدہ آغاز کردیا جائے گا۔
پی ایچ ایف کا کہنا ہے کہ اپنے شراکت داروں کے ساتھ مل کر اس لیگ کو قومی کھیل کی تاریخ کا ایک سنگ میل بنانے کے لیے کوشاں ہیں۔
اس منصوبے کے تحت گراس روٹ لیول سے نئے اور نوجوان ٹیلنٹ کو آگے لانے، پیشہ ورانہ کوچنگ، بہتر انتظامی ڈھانچے کی فراہمی اور کھلاڑیوں کو بین الاقوامی سطح پر ایکسپوژر دینے کے لیے عملی اقدامات جاری ہیں۔
فیڈریشن حکام کے مطابق قومی کھیل کی بحالی کا سفر شروع ہوچکا ہے اور اسے سابقہ عروج پر واپس لانے کے لیے تمام تر صلاحیتیں بروئے کار لائی جا رہی ہیں۔ پاکستان ہاکی لیگ 2027 کے لیے تیاریاں تیز کردی گئی ہیں۔